'आइएमई दसैं-तिहार शुभकामना' शीर्षकको यात्राको क्रममा दसैं अगाडि नै बेलायत पुगेका दम्पती हास्यकलाकार धुर्मुस सीताराम कट्टेल र सुन्तली कुन्जना घिमिरे आफ्नो हास्यकला देखाएर मंगलबार नेपाल फर्केका छन्। यो यात्रामा उनीहरूका साथ गायिका जुना प्रसाईं पनि थिइन्। झन्डै दुई महिने यात्राको क्रममा यो टिमले बेलायतका १ दर्जन बढी स्थानमा आफ्नो प्रस्तुति दिएको थियो। सीतारामका अनुसार सबै कार्यक्रम सफल रूपमा सम्पन्न भएकाले बेलायत यात्रा सुखद बनेको बताए। विभिन्न स्थानमा आयोजित कार्यक्रममा सीतारामले केपी ओलीको गेटअपमा क्यारिकेचर गर्नुका साथै खड्काजीको एकल प्रस्तुति दिएका थिए भने कुन्जनाका साथमा प्रहसन 'सच्चा नागरिक' प्रस्तुत गरेका थिए। आइते र झुम्रीको प्रस्तुतिमा पनि उनीहरूले बेजोड अभिनय कला देखाएका थिए। मेरी बास्सैमा फतौरी बुढीका रूपमा अभिनय गरिरहेकी कुन्जनाले त्यही गेटअपमा अभिनय गरेर हँसाएकी थिइन्।
यो जोडीले 'उध्रेको चोली गीत'मा हास्य व्यंगात्मक नृत्य पनि प्रस्तुत गरेको थियो भने तिहारै आयो लौ झिलिमिलीमा सुन्तलीले एकल नृत्य पस्केकी थिइन्। जोडीसहितको टिमले देउसी-भैलो पनि खेलेको थियो। गायिका जुना प्रसाईंले पनि बेलायत यात्राका क्रममा आफ्ना लोकप्रिय नम्बर गाएर सांगीतिक मनोरन्जन दिएकी थिइन्। भेराइटी गाइज, आसफोर्ड, केन्टले आयोजना गरेको उक्त यात्रा बेलायतमा जन्मेका नेपाली सन्तानलाई नेपाली संस्कृतिसँग नजिक्याउन केन्द्रित थियो।
